Тывада көдээ культура ажылдакчыларының санын ийи катап көвүдедири планнаттынган

Президент Владимир Путинниң эгелээшкини-биле Россияга 2025 чылдың эгезинде «Көдээ культура ажылдакчызы» программа ажылдап эгелээн.

Төлевилел 50 муң чедир чурттакчылыг көдээ черлерже көжүп ажылдаар күзелдиг культура ажылдакчыларын хаара тудар сорулгалыг. Программаның чорудуу-биле оларга бир сая рубль түңнүг деткимчени көргүзер. Тывада ол сорулгага 13 сая рубльди тускайлаан.

ТР-ниң Культура яамызы программаның киржикчилерин мөөрей езугаар шилип алган. Төлевилелге киржир дээн 26 кижиниң аразындан 13 тускай мергежилдигни көдээ культура албан черлеринче ажылга хаара тудар кылдыр шилээн. Оларның аразында үш уран чүүл удуртукчулары, үш бот-тывынгыр театр режиссерлары, үш библиотекарь, үш башкы база тургузукчу балетмейстер бар. Кижи бүрүзү деткимче кылдыр бир сая рубльди алган. Тускай мергежилдиглер программа негелдези езугаар көдээ черлерге беш чылдан эвээш эвес үеде ажылдаары албан.

ТР-ниң Культура яамызы программаның күүселдезин онза хыналдага ап, ажылдап турар үезиниң дургузунда киржикчилерни деткиир. Албан чери культура ажылдакчыларының чүгле профессионал талазын эвес, а амыдырап-чурттаарынга болгаш ажылдаарынга таарымчалыг байдалдарны тургузуп, оларның чедиишкиннерин болгаш үре-түңнелдерин демдеглээр.

«Саяннар» хөгжүм болгаш танцы театрының солизи, Тыва Республиканың алдарлыг артизи Ховар-оол Салчак – программаның көскү төлээлериниң бирээзи. Ол Каа-Хем кожуунда Сарыг-Сеп суурнуң Культурлуг хөгжүлде төвүнде хореограф болуп чедиишкинниг ажылдап чоруур. Ховар-оол бежен хире уругларга хореографияны улуг сонуургал-биле өөредип турар. Ооң өөреникчилери Культурлуг хөгжүлде төвүнге элээн каш самны бараалгадып четтигипкеннер.

Бо программаны 2026 чылда уламчылап, 50 муң чедир чурттакчылыг черлерже 27 чаа культура ажылдакчыларын хаара тударын планнаан.