Эрткен неделяда Тываның Чазаа 2025 чылдың сентябрь 18-тен октябрь 8-ке чедир өрт онза чурумну узадырын шиитпирлээн. Онза чурум үезинде республиканың арга-арыг фондузунда арга-арыглыг девискээрлеринче кирерин кызыгаарлаар болгаш өртке удур айыыл чок чорук дүрүмнерин сагыырын хандырар немелде хемчеглерни киирген. Хамаатыларга одаг кыпсыры, бок өрттедири, өрт үндүрүп болур өске-даа ажыл-херектерни кылыры хоруглуг.
Тываның Баштыңы Владислав Ховалыг бодунуң блогунда чаңгыс чер чурттугларындан түр када кызыгаарлаашкыннарны билип алырын дилээн.
"Бо хемчеглер арга-арыгларывысты болгаш ооң чурттакчыларын камгалаарынга херек. Арга-арыгларывыстың келир үези бистиң кижи бүрүзүнден хамааржыр. Бойдусту камнап кадагалаары – келир салгалдарның чаагай чоруунче үлүг-хуу-дур" – деп, ол айыткан.
Россияның Онза байдалдар яамызының Тывада Кол эргелели хамаатыларга ажык отту (одаг, дуңзаалаар, быжыртынар херекселдер) ажыглаарын хораанын дыңнаткан. Өртке удур айыыл чок чоруктуң бо дүрүмнерин хажыткан таварылгада, торгаал хевирлиг административтиг кеземчелерни онаар: хуу кижилерге 10 муңдан 20 муң рубль чедир; албан-дужаалдыг кижилерге 30 муңдан 60 муң рубль чедир; юридиктиг черлерге 400 муңдан 800 муң рубль чедир.
Хамаатыларның айыыл чок чоруун хандырып, бойдус курлавырларын камгалаар сорулга-биле өртке удур айыыл чок чоруктуң дүрүмнерин болгаш негелделерин сагыыры албан.
Араг-арыг фондузунуң девискээринче кирерде тускай эрттирилге бижиктиг болуру албан дээрзин сагындыраал. Ол бижикти алырда, дараазында адрестиг Тыва Республиканың Арга-арыг яамызынга баар: Кызыл хоорай, Калинин кудумчузу, б. 1Б, 3-кү каът, 311 дугаарлыг кабинет, ажыл хүннеринде 9:00-13:00 шакта, азы кожууннарның арга-арыг ажыл-агый черлери.
