Шагаа байырлалының бүдүүзүнде Тываның Баштыңы Владислав Ховалыг шылгараан ажыл-ишчилерге күрүне шаңналдарын тывыскан.
“Силерниң кызымаккай күш-ажылыңар, сүт дег ак сеткилиңер, төрээн Тываңарга бердингениңер ачызында республикавыс бурунгаар шапкын хөгжүп олурар. Силер ышкаш төлептиг кижилерниң ачы-хавыяазы-биле Тывавыстың сайзыралы ам-даа бедик чадаларже үнер дээрзинге бүзүрээр мен. От олуттуг кызыл Аът чылында силер бүгүдеге аас-кежикти, ам-даа улуг-улуг чедиишкиннерни, быжыг кадыкшылды сеткилимниң ханызындан күзедим!” – Владислав Ховалыг чыылганнарга байыр чедирген.
Россияның Президентизиниң Чарлыы-биле “Россияның юристери ассоциациязы” бүгү-российжи хөй-ниити организацияның Тыва Республика талазы-биле баштаар чериниң даргазы Артур Монгалды “Ада-чурттуң мурнунга ачы-хавыяазы дээш” орденниң II чергезиниң медалы-биле шаңнаан.
“Тускай шериг операциязының киржикчизинге” медальды ТР-ниң ажыл-чорудулганың чамдык хевирлеринге лицензия бээр болгаш хайгаараар албан чериниң удуртукчузунуң оралакчызы Иван Моңгушка, полицияның прапорщиги – Росгвардияның Тыва Республика талазы-биле эргелелиниң тускай сорулгалыг дүрген хөделир “Адыг” мотовзводунуң полицейжизи Айдаш Чоодуга тывыскан.
“Тыва Республиканың кадык камгалалының алдарлыг ажылдакчызы” атка кадык камгалалының хоочуну Майя Базыр-оол төлептиг болган.
Тываның «Саяннар» национал хөгжүм болгаш танцы театрының балет артизи Валентина Биин-оол «Тыва Республиканың алдарлыг артизи» атка төлептиг болган.
“Тыва Республиканың алдарлыг ажылдакчызы” атты “Орук-тудуг транпсорт” кызыгаарлаан харысаалгалыг ниитилелиниң директору Владимир Макшановка тывыскан.
Сүт-Хөл кожууннуң Суг-Аксының Тыва эки турачылар аттыг ортумак ниити билиг школазының эге класстар башкызы Роза Ондар “Тыва Республиканың алдарлыг башкызы” хүндүлүг атты алган.
“Тыва Республиканың культуразының алдарлыг ажылдакчызы” атты Чөөн-Хемчик кожууннуң Мерген-Херел Моңгуш аттыг культура бажыңының кинотеатр талазы-биле кол администратор Альберт Кара-Салга тывыскан.
Тываның ветеринария лабораториязының бактериология салбырының ветеринар эмчизи Урана Сарыглар “Тыва Республиканың көдээ ажыл-агыйының алдарлыг ажылдакчызы” атка төлептиг болган.
“Тыва Республиканың өөредилгезиниң алдарлыг ажылдакчызы” хүндүлүг аттарны: Барыын-Хемчик кожуун чагыргазының өөредилге эргелелиниң методизи Елена Хертекке, Шагаан-Арыг хоорайның 2 дугаар “Тоол” уруглар садының кижизидикчи башкызы Зоя Саяновага, Тес-Хем кожууннуң өөредилге эргелелиниң комплекстиг айыыл чок чорук талазы-биле методизи Римма Соянга тывыскан.
ТЭК-4 башкарыкчы компанияның чиңгине директорунуң техниктиг айтырыглар талазы-биле оралакчызы – кол инженер Николай Данзы “Тыва Республиканың алдарлыг энергетиги” хүндүлүг атты алган.
Тыва Республиканың “Өг-бүлениң үнелиг чүүлдерин кадагааны дээш” медалын хөй ажы-төлдүг өг-бүлелер: Чөөн-Хемчиктен Алдын биле Долума Сундуйларга база Тес-Хемден Александр биле Людмила Туматтарга тывыскан.
Чингис Сааяның тырттырган чуруктары
