Тываның Арга-арыг яамызы республиканың чурттакчыларын «БумБатл» деп бүгү-российжи экологтуг акцияже киржиринче кыйгырып турар.
Россияның Президентизи Владимир Путинниң эгелээни «Экологтуг чаагай чорук» деп национал төлевилелди деткиир сорулгалыг «БумБатл» деп улуг хемчээлдиг экологтуг акция Россия Федерациязынга 2025 чылдың сентябрь 1-ден ноябрь 30-ге чедир эртер.
Акция чурттакчы чонну, бирги ээлчегде аныяк кижилерни, бойдус байлаан камгалаарынга болгаш бойдус курлавырларын шын ажыглаарынга харыысалгалыг хамаарылганы кижизидер сорулгалыг.
«БумБатл» акция ажыглаттынган саазынны улаштыр болбаазырадыр кылдыр чыып тургаш, бойдус курлавырларын кадагалаарынга идепкейлиг киржир арганы кижи бүрүзүнге берип турар. Ол чүүл экологтуг билиглерни бедидеринге болгаш катап ажыглап болур материалдарны шын ажыглаарынга кижизидер.
Тывада «БумБатл» төлевилелдиң кол күүседикчизи болгаш координатору – Тыва Республиканың Арга-арыг болгаш бойдус ажыл-агый яамызы. Хууда сайгарлыкчы Куулар Начын Сүге-Маадырович Кызыл хоорайның Энергетиков кудумчузунда 4 дугаар бажыңда макулатура хүлээп алыышкынын болгаш чыылдазын чорудуп турар. Макулатураны понедельниктен субботага чедир 9:00 шактан 19:00 шакка чедир хүлээп турар. Харылзажыр телефону: 8-906-999-55-88.
Акцияга киржиринче күрүне эрге-чагырга, тус чер бот-башкарылга органнарын, хөй-ниити организацияларын, өөредилге албан черлерин, школа назыны четпээн өөредилге организацияларын, шупту сонуургалдыг кижилерни кыйгырган.
