Кызыл хоорайның 20 дугаар школазының 11-ги классчылары-биле ужуражылганы «Чалыы армия» хөй-ниити шимчээшкининиң регионалдыг штавының удуртукчузу Айдын Шивидек эрттиргенин республиканың немелде өөредилге сайзырадыр төвү дыңнаткан. Ол – Тываның кадет корпузунуң доозукчузу. Улаштыр шериг угланыышкынныг мергежилди шилип алган.
Аныяк удуртукчу доозукчуларга бодунуң күзелдерин чедип алырынга кайы хире күженниишкин, кызымаккай чорук негеттинерин чугаалаан. Ол ышкаш амыдыралга таваржып келир бергелерни төлептиг ажып эртер дээрзин тайылбырлаан.
«Мергежил шилип алыры – амыдыралда чугула шиитпир. Кижи бүрүзү бодунуң сонуургалдарының аайы-биле мергежилди шилип ап, ажыл-ижи чогумчалыг болурун күзээр. Өөреникчилеримниң бирээзи Айдың Шивидек бодунуң күзелин чедип алган болгаш, чедиишкинниг ажылдап чорууру меңээ чоргааранчыг» – деп, 11 «а» класстың башкызы Сайзана Монгуш демдеглээн.
Доозукчуларга бо ужуражылга ажыктыг болган. Оолдар, уруглар шериг мергежилдиң дугайында хөйнү билип алганнар. Ол ышкаш чедиишкинче болгаш бот-сайзыралче тура-сорукту оттурган.
