Тываның Баштыңы Владислав Ховалыг сайыттар кабинединге «Хойжу» төлевилелдиң бирги номчулгазын сайгаргаш, чедир ажылдаар кылдыр дедир эгиткен. Көдээ ажыл-агый бүдүрүлгезин хөгжүдер күзелдиг кижилерге дузаламчы хемчеглерин тургузары эгелээшкинниң кол сорулгазы ол деп, Владислав Ховалыг демдеглээн.
Владислав Ховалыг программаны боттандырарының кол негелделерин болгаш планнаттынган сорулгаларын тодараткан: «Төлевилел хой болгаш өшкү малды өстүрүп көвүдедип чоруур араттарга деткимчени көргүзер. Амгы үеде хой болгаш өшкү малдап чоруур ажыл-агыйларга грантыга 300 баш хойну берип, чыл санында 18 киржикчини хаара тудар план бар. Арат бизнезин хөгжүдер фонд таварыштыр амгы араттар ажыл-агыйын калбартыр аргалыг: чылдың-на 450 баштан тургустунган 26 кодан хевирлеттинер. Социал-экономиктиг хөгжүлдезининиң амы-хууда программазы-биле улуг бүдүрүлгелерге чылдың-на 700 хире баш хойлуг чеди мал ажыл-агый комплекизин тургузар ужурлуг».
Тываның Баштыңының даалгазы-биле Тываның Көдээ ажыл-агый болгаш аъш-чем яамызы төлевилелди ажылдап кылган. Ол хой болгаш өшкү азырап көвүдедип чоруур малчыннарга күрүне деткимчезиниң хемчеглери-биле мал ажыл-агый адырының экономиктиг үре-түңнелин бедидер сорулгалыг.
«Наадым-2026» малчыннар байырлалының үезинде төлевилелди таныштырган. Бүгү республикадан ат-сураглыг, билдингир малчыннар ооң сайгарылгазынга киришкен.
Мал ажыл-агыйының хоочуннары болгаш мурнакчылары сайгарылга үезинде төлевилелдиң ажыктыын болгаш чогуур үезинде эгелээр деп турарын демдеглеп, аңаа киржириниң негелделеринге хамаарыштыр санал-оналдарын кииргеннер. Программаны ам-даа чедир кылырынга адырның төлээлериниң санал-оналдарын кичээнгейге алган.
Тываның Чазаанга хурал үезинде сайыттар кабинединиң кежигүннери төлевилелди боттандырарының арга-хевирлеринге хамаарыштыр элээн каш тодарадыр айтырыгларны салган. Түңнелинде, киржикчилерни шилип алырының негелделеринге болгаш оларның аразынга курлавырларны хуваарының чурумунга хамаарыштыр деткимче хемчеглерин чедир ажылдап, тодарадыр кылдыр төлевилелди бирги номчулгага бадылаар деп шиитпирни хүлээп алган.
Уксаалыг мал ажыл-агыйының инфратургузуун хөгжүдери – Тываның Көдээ ажыл-агый болгаш аъш-чем яамызының мурнады боттандырар сорулгаларының бирээзи деп, Владислав Ховалыг 2026 чылда ТР-ның Дээди Хуралынга Айыткалында албан черинге айыткан.
