– 2022 чылда Тывага "Кызыл кош" акциязын чарлаптарга-ла, Мөңгүн-Тайга кожууннуң идепкейжи авалары чыглып алгаш, дайынчыларга дузалажып эгелей берген бис. Бо хүнде 20 хире кижи ажылдап турар бис. Колдуунда чажырттынар четкилер, соой бээрге, чылыг чеңи чоктарны, госпитальдарда чыдар оолдарга иштики хептер дээш оон-даа өске чүүлдерни, тыва оолдар үргүлчү артыш чагыыр боорга, ону хаптааш чорудуп турар бис.
Өөм ээзи Ачыты Салчак сарлык кадарчызы. Ынчангаш өг-бүлевистиң мурнундан фронтуже сарлык эъдин чорудуп берип турар бис. Оон аңгыда тыва далган, куруттар дээш 55-ки мото-адыгжы бригаданың дайынчыларының чагыгларын чорудар-дыр бис.
Мен база дайынчы оолдуң авазы мен. Оглум 2022 чылдан бээр амга чедир тускай шериг операциязында киржип турар. Бөгүн эки турачыларның республика чергелиг шуулганынга Тываның Чазаа мээң ажыл-ижимни эскерип, Өөрүп четтириишкинниң бижиин тывысканынга өөрүп тур мен. Ол дээрге-ле мээң кады ажылдап чоруур эки турачы эш-өөрүмнүң деткимчези-дир.
