Республиканың 19 муниципалдыг тургузугларында 30 хөй-ниити шөлдерин 2024 чылда чаагайжыдар. Тываның Чазаа «2018-2024 чылдарда амгы үениң хоорай хүрээлеңин хевирлээри» күрүне программазынче чогуур немелдени киирген.
Тываның Баштыңы Владислав Ховалыг хүлээп алганы шиитпириниң дугайында дыңнадып тура, «Чурттаар оран-сава болгаш хоорай хүрээлеңи» национал төлевилелди боттандырган «Таарымчалыг хоорай хүрээлеңин хевирлээри» төлевилел республиканың муниципалитеттеринге чаагайжыттынарының улуг аргаларын берип турарын демдеглээн. Тывага ук программа күүселдези-биле 165 хөй-ниити шөлдерин чаагайжыткан.
Бо чылдың апрельдиң 15-тен май 31-ге чедир чоруткан онлайн бадылаашкынның түңнели-биле шиитпир хүлээп алдынганын ТР-ниң Тудуг яамызы дыңнаткан. Тываның 102000 чурттакчызы бадылаашкынга киржип, идепкейи-биле Россияның регионнар аразындан үшкү черже үнген.
Владислав Ховалыг бүгү-российжи онлайн бадылаашкынга идепкейлиг киришкени дээш чурттакчы чонга четтиргенин илереткен. «Силерниң идепкейлиг киржилгеңер ачызында девискээрлерни чаагайжыдарынга немелде акша-хөреңгини камгалап алган бис» – деп, бижээн.
za.gorodsreda.ru порталдың дыңнатканы болза, республиканың кожуун база хоорайларындан 72 төлевилел мөөрейже кирген, 2024 чылда боттандырар кылдыр ооң 30-и шилилдени эрткен. Федералдыг бюджеттен 100 сая рубльди Тывага тускайлаан.
Келир чылын хөй-ниити девискээрлериниң чаагайжыдылгазынче регионалдыг болгаш муниципалдыг бюджеттер акшаландырыышкыны-биле кады көрдүнген ниити инвестицияның хемчээли 102 сая рубль.
Амгы үеде тус чер чагыргалары шилилдеге тиилээн төлевилелдеринге дөзевилел-төлевилел документилерин кылыр керээлер чарарынче кирген. Ол ажылды 2023 чылдың декабрь 1-ге чедир доозар ужурлуг.
2024 чылда чаагайжыдылга онлайн-бадылаашкынынга Тывадан шилиттинген хөй-ниити девискээрлериниң даңзызы:
- Кызыл хоорай: «Тываның найысылалының мурнуу кезээнде тускай шериг операциязының киржикчилери маадырлар парыгы» хөй-ниити девискээри; көвүрүгден оң талакы эриктиң дачалар ниитилелинге чедир чадаг-терге оруун ; «Кызылдың Каа-Хем кудумчузундан Интернациональная кудумчузунга чедир Дружба кудумчулап аллея» хөй-ниити девискээрин чаагайжыдары.
- Ак-Довурак хоорай: Алдар аллеязын чаагайжыдары.
- Бай-Тайга кожуун: Кызыл-Даг суурда хоккей шөлүн чаагайжыдары.
- Барыын-Хемчик кожуун: Барлык суурга дыштанылганың хөй-ниити девискээрин; Шекпээр суурнуң Ленин кудумчузунга Чаңгыс эп-сеткил шөлүн; Аксы-Барлык суурда хөй-ниити девискээри чаагайжыдары.
- Чөөн-Хемчик кожуун: Ийме суурга уруглар ойнаар спортчу шөлдү;
Шеми суурга спортчу шөлдүг дыштанылга девискээрин;
Чадаана хоорайның культура бажыңының Ленин кудумчузунда хөй-ниити девискээрин чаагайжыдары.
- Каа-Хем кожуун: Кундустуг суурда тураскаал чанын;
Сарыг-Сеп суурда «Мандала» сесерлиин чаагайжыдары.
- Кызыл кожуун: Сукпак суурда “Чаңгыс эп-сеткил” скверин; Кара-Хаак суурда Аныяктар сесерлиин; Каа-Хем суурда Алдар аллеязын чаагайжыдары.
- Мөңгүн-Тайга кожуун: Мугур-Аксы суурда Кошкар-оол кудумчузунда стадионну чаагайжыдары.
- Өвүр кожуун: Хандагайты суурнуң төп шөлүн чаагайжыдары.
- Бии-Хем кожуун: Өөк суурда Ада-чурттуң улуг дайынга тураскаал шөлүн; Аржаан суурда Ленин кудумчузун чаагайжыдары.
- Сүт-Хөл кожуун: Кара-Чыраа суурнуң стадионун чаагайжыдары.
- Таңды кожуун: Дүрген суурнуң хөй-ниити шөлүн чаагайжыдары.
- Тере-Хөл кожуун: Кунгуртуг суурнуң «Хаан-Тайга» стадионун чаагайжыдары.
- Тес-Хем кожуун: Берт-Даг суурда Кидиспей кудумчузунда хөй-ниити шөлүн чаагайжыдары.
- Тожу кожуун: Ий суурда «Ом мани» парыгын; Адыр-Кежиг суурда Аңчы кудумчузун чаагайжыдары.
- Улуг-Хем кожуун: Шагаан-Арыг хоорайның культура төвүнүң чанында шөлдү чаагайжыдары
- Чаа-Хөл кожуун: Чаа-Хөл суурнуң дыштанылга сесерлиинге брусчатканы чадары.
- Чеди-Хөл кожуун: Сайлыг суурнуң стадионун чаагайжыдары.
- Эрзин кожуун: Эрзин суурда парк девискээрин чаагайжыдары.
