Тываның дириг амытаннар делегейиниң объектилерин камгалаар күрүне комитединиң инспекторлары тайгада чайгы дыштанылга лагерьлеринче чедип, доктаамал рейдилерни чорудуп турарын комитет дыңнаткан.
Күрүнениң аңныыр комитеди тайга-сын девискээринде дыштанылга лагерьлеринде аъш-чем артынчыларын үе-шаанда үндүр сөөртүрү чугула дээрзин айыткан. Чүге дизе черлик дириг амытаннар аъш-чем артынчыларын «амзаар» дээш, лагерьниң девискээринче кирип болур.
Күрүне инспекторлары Каа-Хем кожуунда «Бельбей» чайгы лагерьде бок артынчыларын үе-шаанда үндүр сөөртүп турарын хынаан.
«Чайгы лагерьниң удуртулгазы аъш-чем артынчыларын үе-шаанда үндүр сөөртүр дээш регион оператору-биле керээни чарган. Ол ышкаш черлик дириг амытаннарга таварышкаш, канчаар алдынарының дүрүмнерин база оваарымчалыг болурунуң хемчеглерин тайылбырладывыс» – деп, Каа-Хем кожуун талазы-биле күрүне инспектору Александр Маслов дыңнаткан.
Дыштанылга баазаларының болгаш уруглар лагерьлериниң девискээринге бок, ылаңгыя аъш-чем артынчыларын чыып болбас дээрзин күрүнениң аңныыр комитеди сагындырып турар. Органиктиг артынчыларны элээн ханыладыр хөмери безин дузалавас, чыдыыргак адыг ону белени-биле тып ап, казып алыр.
