Бай-Хаак школазында ийиги аграрлыг класс ажыттынганын өөредилге чери дыңнаткан. 5 «а» класстың өөреникчилери эртем-билигни чедип алырын аазаан, байырлыг даңгыракты бергеннер.
Тускай угланыышкынныг класс школачыларга көдээ ажыл-агый адырын аңгы-аңгы хевирлерге өөренир шөлчүгеш апаар. Олар шилип алган угланыышкынынга хамаарышкан эртемнерни ханы өөренип, чер-ажылдыгларның мастер-класстарынга киржир.
Өөреникчилер амгы үении-биле дериттирген лабораторияларга практиктиг ажылдарны кылып, көдээ ажыл-агый бүдүрүлгезиниң шынарын экижидер, агротехнологиялар сайзырадыр төлевилелдерге болгаш шинчилел ажылдарынга киржирлер.
Таңдының көдээ ажыл-агый эргелелиниң удуртукчузу Шолбан Ондар көдээ ажыл-агый чурттуң болгаш республиканың экономиказының кол өзээ дээрзин демдеглээн. «Агротехнологиялар сайзыралы болгаш тускай мергежилдиглерниң билиг-мергежилин бедидери – чедимчелиг келир үениң үндезини» деп, ол чугаалаан.
Шолбан Ондар база школаның директору Ольга Санчы уругларга чалыы чер-ажылдыгларның шынзылгаларын тыпсып, байыр чедирген.
Бай-Хаакта «Аныяктар болгаш уруглар» национал төлевилелдиң ачызында туттунган школа бо чылдың сентябрьда уругларга эжиктерин ажыткан.
