Тываның Баштыңы Владислав Ховалыг агаарның температуразы хенертен батканы-биле, амыдырал-хандырылга системаларының, социал объектилерниң үзүктел чок ажылдаарын, оттулар чүүл шыгжамырларында хөмүрнүң бар-чогунче кичээнгейни күштелдирерин чогуур албан черлеринге дааскан.
Владислав Ховалыг күштүг сооктар үезинде айыыл чок чоруктуң дүрүмнерин сагыыр талазы-биле чурттакчы чон ортузунга тайылбыр ажылын күштелдирерин дааскан.
Сооктуң уржуундан оруктарга туманнап, көстүрү 50 метр хире апарып, онза байдалдарны тургузуп болур айыыл бар. Россияның Онза байдалдар яамызының Тывада Кол эргелели ырак оруктан, ылаңгыя дүне чер чоруурундан, ойталаарын чолаачыларга сүмелеп турар.
ТР-ниң орук-транспорт сайыды Шораан Чыргал-оол орук черлери хондур-хүнзедир ажылдап турарын, чолаачылар болгаш пассажирлер чынныр база чогуур дуза ап болур 11 чылыг черлерни республиканың оруктарында белеткээнин дыңнаткан. Айыылдыг орук участоктарынче онза кичээнгейни салып, чүс хире тускай орук техникалар дайгакка удур элезин-сайны доктаамал төп турар.
Орукчулар орук дүрүмнерин сагыырын, дүрген халдырын кызыгаарлаарын, айыыл чок ыракшылды шыңгыы сагыырын чолаачыларга сүмелээн. Орукче үнер мурнунда, машинаның техниктиг байдалын хынап, оруун болгаш чедип кээр үезин улузунга дыңнадып каар ужурлуг.
