Тускай шериг операциязында киржип турар дайынчыларга ачы-дуза чыылдазы уламчылавышаан. Кижи бүрүзү тиилелгени чоокшулаштырар дээш үлүг-хуузун киирип турар.
«Селера-Т» ажык акционерлиг ниитилелдиң офис болгаш бажың эт-севи бүдүрүлгезиниң ажылдакчылары тускай шериг операциязының киржип турар дайынчыларны деткип, акша-төгерикти чыггаш, Улусчу фронтунуң Тывада салбырының агар-санынче шилчиткен.
Бүдүрүлгеде дөрт кижи ажылдап турарын удуртукчузу Александр Карпов дыңнаткан. Ачы-дуза чедирилгезинде олар бир дугаар киржип турар. Бүдүрүлгениң ажылдакчылары фронтуда мурнуку одуругда тулчуп турар дайынчыларга техниктиг дериг-херекселдер садып алырынга 100000 рубльди чыгган.
Ачы-дуза чыылдазы апрель 28-ке чедир уламчылаар. Тускай шериг операциязында киржип турар дайынчыларга ачы-дуза чыыр пункт дараазында адресте ажылдап турар: Кызыл хоорай, Тыва эки турачылар кудумчузу, 3. Харылзажыр телефону: 2-10-50.
«Бүгү чүүлдү тиилелгеже!» федералдыг төлевилелдиң чорудуу-биле ачы-дуза чыылдазын база чорудулгазын Ниити-российжи улусчу фронт организастап турарын сагындыраал.
