IV делегей чергелиг сарыг шажын шуулганынының ажыл-чорудулгазы-биле «Чонар-даш» мөөрейниң муниципалдыг чадазы Кызыл, Таңды, Чаа-Хөл, Улуг-Хем, Бии-Хем, Бай-Тайга, Мөңгүн-Тайга кожууннарга болгаш Кызыл хоорайга эрткенин республиканың немелде өөредилге сайзырадыр төвү дыңнаткан.
Бичии даш чонукчулары онзагай уран-талантызын бараалгаткан. Школачылар мөөрейге улуг сонуургал-биле киржип, даштан онзагай хевирлерни сиилбээн.
Мөөрейниң «Дең арга-шинектер» категориязында кадыкшылының аайы-биле харык-шинээ кызыгаарлыг беш уруг киржип турар. Чогаадыкчы ажыл оларны хаара тудуп, кандыг-даа шаптараазыннарны ажып эртерин херечилээн.
Мөөрейниң темазы – «Буддийжи ыдыктар болгаш овур-хевирлер». Хемчегниң регионалдыг чадазы апрель айның эгезинде болуп эртер.
Уругларның тергиин ажылдарын IV делегей чергелиг сарыг шажын шуулганының үезинде делгелгеге салыр болгаш, Тываның онзагай каас-чараш культуразын делегейге алдаржыдар.
