Хоойлуга удур шыгжап турганы боо-чепсекти дужааган дээш төлевирни үш катап көвүдеткен

Тываның Баштыңы [id360104045|Владислав Ховалыгның] даалгазы-биле, республикада хоойлуга удур шыгжап турган боо-чепсээн хүлээдип берген хамаатыларга шаңналдың хемчээлин улгаттырган. Регионнуң чазаа февраль 26-да чогуур шиитпирни хүлээп алган.

Саналды кииргеннерниң бирээзи – ТР-ның Аңныыр хайгааралының күрүне комитединиң дыңнатканы болза, 2022 чылда-ла доктааткан амгы төлевирлерни өстүрүпкени республиканың чурттакчыларынга хоойлуга удур садып алганы ок-боозун бодунуң күзели-биле дужаарынга сонуургалды болдурар. Чижээ, араалыг боо дужааган дээш шаңнал 15 муңдан 45 муң рубль чедир, а дүүрге дээш 10 муң рубльден 30 муң рубль чедир өскен.

Бир эвес бодунуң күзели-биле дайынчы боо-чепсекти эккээр болза, ооң мурнунда ышкаш 15 муң рубльга эвес, а 45 муң рубльга хүлээп алыр. Боду кылган болгаш эде өскерткен чепсекти ооң мурнунда 5 муң рубльге ап турган болза, ам 15 муң рубль апарган.

Хоойлуга удур өске хевирниң ок-боозун дамчытканы дээш төлевир хевээр арткан. Оларга бот-камгалал чепсектери, ооң иштинде электрошокерлер, травматиктиг база газтыг пистолеттерге 2 муң рубльди төлээр, боо октары (ок бүрүзүнге 10 рубль), гранаталар, миналар болгаш снарядтар (1 муң рубль), частыр тургузуглар (1,5 муң рубль), частыр бүдүмелдер (400 рубль) дээш, өске-даа хевирлер хамааржыр.

Ок-боо, чепсек, чазылдырар чүүлдер азы херекселдерни хоойлуга удур шыгжап турарының фактылары болгаш черлери дугайында шын медээлер дээш чурттакчыларга төлевирни төлээри база көрдүнген. Ындыг медээ дыңнаткан улуска боо азы ок-чепсектиң аайы-биле доктааткан шаңналдың 50 хуузун төлээр.

ТР-ниң Иштики херектер яамызындан документилер кирген соонда, он хонуктуң дургузунда ТР-ның Аңныыр хайгаарал күрүне комитеди шупту төлевирлерни төлээр.