Дүүн Тываның найысылалында эптештирилге судунга социал четкилерге коронавирус дугайында меге медээ (фейк) тараткан эр кижиге административтиг херекти көрген дугайында @tmgnews17 дыңнаткан. COVID-19 аарыглыг кижи Тывада илерээн дугайында тыва дылга видео дыңнадыгның автору Денис Михайлов.
Социал четкилерде тараан меге медээниң авторун Кызылдың операвтивтиг истелге ажылдакчылары илереткеш, административтиг протоколду долдурган.
Михайлов болчукчузу-биле суд хуралынга озалдааны-биле, шииткекчи оперативтиг истелге ажылдакчызының чугаазын дыңнаан.
Денис Михайлов коронавирустан аараан кижи дугайында медээни социал четкилерден тып алгаш, ол “чугула” медээ-биле үлежир бодаанын TMG чугаалаан. Ол медээниң “ссылказын” (айтыг) Telegram-канал таварыштыр херээжен кижи чоруткан.
Кызылдың эптештирилге суду медээниң авторун буруулуг деп хүлээп көргеш, фейк тарадып турган iPhone телефонун хавыргаш, 30 муң рубльга торгаан. Судтуң үндүрген шиитпиринге 10 хонук дургузунда хомудал киирер үези бар дээрзин Михайловтуң болчукчузу TMG дыңнаткан.
www.tmgnews.ru Информагентство «ТуваМедиаГрупп»
Фото «ТуваМедиаГрупп»
