Тываның Аныяктар парламентизиниң даргазы Артыш Монгуш чурттуң Үндезин Хоойлузунче киирген өскерилгелерниң дугайында бодалын илереткен: - Россияның Үндезин Хоойлузунче социал камгалалдарны кииргенин чөптүг деп бодаар-дыр мен. Социал магадылалдың бир чадазынче үнүп турарывыс ол. Ону бадылап алгаш, күрүне кижилерниң мурнунда хүлээлгезин кандыг-даа байдалда үреп шыдавас деп, В. Путин демдеглээн. Чижээлээрге, улуг назылыгларның пенсиязынга бир чылда ыяап-ла индексацияны кылыр. Шак мындыг өскерилгелер чоннуң бүзүрелин быжыктырар.
Социал магадылалдар талазы-биле эдилгелерни хоойлу-дүрүм дылы-биле канчаар долдурганыл?
75 чүүл
5. Россия Федерациязы хамаатыларның күш-ажылын хүндүлеп көрбүшаан, оларның эрге-ажыктарының камгалалын хандырып турар. Ниитизи-биле Россия Федерациязының иштинге күш-ажыл кылып шыдаар чурттакчы чоннуң амыдырап-чурттаарының эң адакы хемчээлинден эвээш эвес күш-ажыл төлевириниң эң адакы хемчээлин күрүне магадылап турар.
6. Россия Федерациязында бүгү-ниитиниң, чөптүг чоруктуң болгаш салгалдарның эп-сеткил каттыштырылгазының принциптеринге үндезилеп, пенсия хандырылгазының системазы хевирлеттинип турар болгаш ооң үре-түңнелдиг ажылдап хөделиринге деткимчени көргүзүп турар, а ол ышкаш федералдыг хоойлуда доктааттынган чурум езугаар пенсия индексациязын чылда бир катаптан эвээш эвес боттандырар.
7. Россия Федерациязында федералдыг хоойлуга дүүштүр ыявыла социал камгаладылга, хамаатыларның адрестиг социал деткимчези база социал пособиелерниң болгаш өске-даа социал төлээшкиннерниң индексациязы магадылаттынып турар.
РФ-тиң Үндезин Хоойлузунче өскерилгелер киирер бүгү чоннуң бадылаашкын хүнүн короновирус тарап болурунуң чылдагааны-биле, өске хуусааже чылдырып болур.
