Россияда чоннарның чаңгыс деминиң чылы база Төрээн дылдар хүнүн таварыштыр Тула облазының Сосновка ортумак школазы, Донецк Улус Республиканың Харцызск хоорайының 2 дугаар школазы, Татар Республикада Нижнекамск хоорайның 25 дугаар гимназиязы база Кызылдың 9 дугаар гимназиязы онлайн “телекөвүрүг” эрттиргенин республиканың немелде өөредилге сайзырадыр төвү дыңнаткан.
Школачылар онлайн хевирге чугаалажып, төрээн дылдарның чугулазын демдеглевишаан, чоннарның культурлуг өнчүзүн кадагалаары чугула дээрзин айытканнар.
«Хемчег найыралдың болгаш чаңгыс демниң тевиинге эрткен. Регионнар аразының харылзаазы школаларның эп-демин быжыктырып, төрээн дылга хүндүткелди оттурар дээрзи чугаажок. Бистиң школавыстың мурнундан “телекөвүрүгнү” организастаан башкыларга четтиргенимни илереттим» – деп, организакчыларның бирээзи, школада директорнуң кижизидилге талазы-биле чөвүлекчизи Шораана Оюн чугаалаан.
Школа бүрүзү бодунуң езу-чаңчылдарын, культуразын, чедиишкиннерин бараалгаткан. Хемчегниң киржикчилери төрээн дылынга шүлүктерни чугаалап, ырларны ырлашканнар.
