Кызылдың 9 дугаар гимназиязынга республика чергелиг «Мээң төрээн дылым» деп эссе-чогаадыглар мөөрейи болуп эрткенин ТР-ниң Өөредилге яамызы дыңнаткан.
Ук хемчег Россияда чоннарның чаңгыс деминиң чылы база делегейниң төрээн дылдар хүнүнге тураскааттынган болгаш, регионнуң чурттакчы бүрүзү төрээн дылынга ынакшылын илередип, ону кадагалап арттырарының, хөгжүлдезиниң чугулазын айтыр аргалыг болган.
Ол ышкаш школачылар «Тыва Пюрбюну номчуп турар» деп республика чергелиг онлайн-акцияга катчып, тыва чогаалчыларның шүлүктерин аянныг номчаан. Мөөрейни Тываның Өөредилге яамызының деткимчези-биле ТР-ниң Националдар херектериниң агентилели база А. С. Пушкин аттыг национал ном саңы, Тываның Чогаалчылар эвилели организастаанын сагындыраал. Ук онлайн-акцияны тыва классиктиг чогаалды нептереңгейжидер, тыва дылды кадагалаар сорулга-биле эрттирген.
ТР-ниң Националдар херектериниң талазы-биле агентилелиниң удуртукчузу С.М. Ощепкова хемчегниң байырлыг ажыдыышкынының үезинде гимназияның ном саңынга номнарны белек кылдыр сөңнээн.
«Бистиң ном саңынга номнарны белек кылдыр бергени өөрүнчүг-дүр. Гимназияның ном саңының фондузунда чаа литература немежип, уругларның өөредилгезинге боттуг дузалыг болур» – деп, башкылар демдеглээн.
Тываның А. С. Пушкин аттыг национал ном саңының ажылдакчылары Буяна Иргит база Чечек Монгуш номнар делгелгезин кылып, Сергей Пюрбюнуң чогаадыкчы ажыл-ижин уругларга таныштырган.
