Делегей чергелиг IV сарыг шажын шуулганның хүннеринде Арат шөлүнге «Ак алаң-тостуң тоолчургу чугаалары» деп езу-чаңчылдар болгаш төөгүлүг чугаалар фестивалы болуп эрткен.
Хары угда үш регионнуң езу-чаңчылдарынга болгаш маадырлыг салгалдарынга тураскааткан төлевилелди Тыва бир дугаар боттандырган. Фестивальдың демдээ – ак алаң-тос хөй янзы чоннарның чаңгыс демин чеченчиткен аян-биле илередип турар.
Культурлуг болгаш чырыдыышкынныг улуг төлевилел Россияның сарыг шажын регионнарының (Тыва, Бурятия болгаш Калмыкия) культуразының, езу-чаңчылдарының байлаан көргүзүп, культуралар аразында харылзаазын илереткен.
Оон аңгыда IV сарыг шажын шуулганга болгаш Россияның чоннарының чаңгыс деминиң чылынга тураскааткан «Өлчей» национал культураларның регионнар аразының фестивалы база болуп эрткен. Хемчегни Росконцерттиң деткимчези-биле эрттирген.
Бурятияның «Байкал» национал ыры болгаш танцы театрының, Калмыкияның «Тюльпан» академиктиг танцы ансамблиниң болгаш Тываның күрүнениң «Саяннар» хөгжүм болгаш сам театрының артистери чаңгыс сценага катаптаттынмас оюн-көргүзүүн бараалгаткан.
Шуулган хүннеринде шөлде тиккен өглерге аңгы-аңгы хемчеглерни эрттирген. Аалчылар тыва өгнүң, тожу чадырының, орус чоннуң оран-савазының эт-херекселдери-биле, тыва улустуң онзагай эртинези – хөөмей, эр кижиниң үш оюну, хөгжүм херекселдери, хуулгаазын чонар-даш уран чүүлү-биле таныжып, кидис салырын шенеп, кажык, панчык, буга-шыдыраа... оюннарга киржип, тыва улустуң тоолчургу чугааларынга үндезилээн театржыткан көргүзүглерни база көрген.
Фестивальдың база бир солун кезээ – мультимедийлиг шоу Арат шөлүнде фонтанга болуп эрткен. Чыылган чон бурят аас чогаалга үндезилээн Байкал, Ангара болгаш Енисей дугайында база Өскүс-оол дугайында тоолчургу чугааларны видеопроекциялар, чырык эффектилери, этниктиг хөгжүм болгаш фонтанның агымының чаңгыс аай шимчээшкинин таварыштыр сонуургап көрген.
«Ак алаң-тостуң тоолчургу чугаалары» база «Өлчей» фестивальдары хамыктың кичээнгейин хаара туткан.
«Ак алаң-тостуң тоолчургу чугаалары» төлевилелин Президентиниң культурлуг эгелээшкиннер фондузунуң грантызының деткимчези база ТР-ниң Культура яамызының акшаландырыышкыны-биле боттандырган.
