Тываның маадырлары: Кадрлар төлевилелиниң тос тиилекчизи ажылда тургустунган

Тыва Республикада тускай шериг операциязының хоочуннарындан болгаш киржикчилеринден удуртукчулар курлавырын тургузарынче угланган «Тываның маадырлары» регионалдыг кадрлар төлевилели чедиишкинниг күүсеттинип турар. Тываның Баштыңы [id360104045|Владислав Ховалыг] бодунуң албан езузунуң каналынга программаның чорудуун дыңнаткан.

Эрткен чылын Ада-чурт камгалакчызының чылында чарлаттынган төлевилел Тываның онзагайын ханы билир болгаш экономика, социал политика, күрүне эргелеп-башкарылгазында чидиг айтырыгларны чедимчелиг шиитпирлээр арга-дуржулгалыг шыырак удуртукчуларны белеткээринче угланган. Программаның бирги сорулгазы – республиканың хөгжүлдезинге улуг үлүг-хуузун киирер удуртукчуларның профессионал командазын тургузары.

Владислав Ховалыг ажылдар план езугаар чоруп турарын дыңнаткан. Декабрьда киржикчилер хүндүскү өөредилгениң кол чадаларының бирээзин чедиишкинниг доозуп, баштайгы шылгалдаларны эки дужааган. Амгы үеде стажировканың ийиги чалгыы эгелээн: финалче кирген киржикчилер арга-дуржулгалыг дагдыныкчыларының – яамылар болгаш албан черлер удуртукчуларының удуртулгазы-биле практиктиг белеткелди эртип турар. Бо арга киржикчилерге ажылчын олуттарынга дорт удуртулга дуржулгазын шиңгээдип, боттуг шиитпир хүлээп алырынга дузалаар.

«Ооң-биле чергелештир киржикчилер түңнел чадага белеткенип эгелээн – бистиң регионну хөгжүдеринче угланган чиге айтырыгларлыг доозукчу ажылдар темаларын тургузуп турар» - деп, Владислав Ховалыг чарлаан.

Бөгүнде төлевилелдиң тодаргай түңнелдерин көрүп болур. Финалче кирген тос киржикчи профессионал билиг-мергежилинге болгаш хууда арга-дуржулгазынга даянып, ажылдарда чедиишкинниг тургустунган. Россияның Маадыры Буян Куулар ТР-ниң аныяктар херектериниң сайыдында томуйлаткан. Ажыл-чорудулганың чамдык хевирлеринге лицензия бээр албанның удуртукчузунуң оралакчызы албан-дужаалда Иван Монгуш ажылдап эгелээн. Шораан Монгуш Чадаананың «Чечена» уруглар садының эргелекчизиниң оралакчызы ажылда кирген. Тускай шериг операциязының хоочуну Руслан Ондар Кызылда президентиниң кадет училищезинде организатор башкы апарган.

Россия Федерациязының Пенсия болгаш социал камгаладылга фондузунуң Тывада салбырының кол специалист-эксперти кылдыр Вячеслав Федоровту хүлээп алган. Россияның Федералдыг кеземче албанының Тывада эдип-чазаар төвүнде аңгылаттынган участокта Шолбан Хомушкуну инспектор кылдыр томуйлаан. Конгар Кылан-оол Кызыл хоорай мэриниң тускай шериг операциязының айтырыгларының талазы-биле чөвүлекчизи албан-дужаалынче кирген. Кызыл хоорайның Төлээлекчилер хуралының депутадынче Эртине Кара-Сал соңгуттурган, а Азият Догдугаш «Чөптүг Россия» социалистиг партияның республикада регионалдыг салбырын удуртуп эгелээн.

Ам чаа албан-дужаалдарже база ийи тиилекчини бадылаан, олар амгы үеде документилерин долдурарын дооскан. Программа киржикчилериниң чамдыызы амгы үеде шериг албанын уламчылап, албан хүлээлгелерин күүсетпишаан, өөредилгезин ырактан доозуп турарын демдеглээри чугула.