«ДҮЛГЭЭЗИННИГ АЯН» ШҮЛҮКТЕР МӨӨРЕЙИ

К.И. Чуковский аттыг уругларның ном саңынга Тыва дыл хүнүнге база Улустуң чогаалчызы А. Даржайның 75 харлаан юбилейинге тураскааткан «Дүлгээзинниг аян» деп бодунуң чогаатканы шүлүк мөөрейи болуп эрткен эрткен. Мөөрейге уран сөске салымныг уруглар боттарының чогааткан шүлүктерин бараалгаткан. А мөөрейниң кол сорулгазы – төрээн тыва дылывысты хүндүлеп, ону камнап кадагалаарынга уруг­ларны кижизидери. Мөөрейже 25 шүлүк киирген. Маңаа Кызыл хоорайның № 2, 7, 11, 9, 15 школалары база Кызыл кожууннуң Ээрбек биле Кара-Хаак сумуларның школалары идепкейлиг болган. Жюри кежигүннери шү­лүкчү, чогаал шинчилекчизи, филология эртеминиң кандидады Сайлыкмаа Комбу, Россияның алдарлыг журнализи, Тыва Республиканың культуразының алдарлыг ажылдакчызы, чогаалчы, «Алдын-Кушкаш» сеткүүлдүң кол редактору Александр Шоюн, ном саңының удуртукчузунуң оралакчызы Өнермаа Амырмит олар болган. Мөөрейниң түӊнелинде бирги чергениң Дипломунга Ээрбек сумузунуң О.К. Оолак аттыг школазының 4 «б» клазының өөреникчизи Ай-Кыс Камзарова төлептиг болган. Ийиги черни Кызыл хоорайның № 2 школазының 7 «а» клазының өөреникчизи Тандынчап Монгуш, үшкү черни база-ла № 2 школаның 3 «г» клазының өөреникчизи Алдын-Сай Хертек алган. Ээрбек школазының 3 «а» клазының өөреникчизи Ооржак Шовааны база Кызыл хоорайның № 11 школазының 10 «а» клазының өөреникчизи Донгак Сайзананы тускай шаңнаан. Шупту киржикчилерге дипломнар болгаш шынзыдылга бижиктерни тывыскан. Мөөрейниң киржикчиле­ри­ниң чамдык шүлүктерин жюри кежигүннери мак­таан. «Ёзулуг талантылыг, улуг быжыккан шүлүкчүлер-биле дөмей авторлар бар-дыр» – деп, жюри даргазы Сайлык­маа Салчаковна магадап демдеглээн. Бистиң тыва дылывыс байлак дээрзин бичии уруг­лар мөөрейге көргүскеннер. Бистиң хүннүң-не амыдыралда ажыглап турарывыс бөдүүн сөстерни уруглар шүлүк кылдыр хуулдуруп бараалгаткан. Оларның чамдыызы дыңнакчыларның ки­чээнгейин хаара туткан. Бистиң дылывыс дээрге өгбелеривистиң салгалдарга арттырган эртинези-дир, ынчангаш төрээн дылывысты хумагалап чоруур болзувусса эки. К.И. Чуковский аттыг ном саңының чурт-шинчилел болгаш национал чогаал килдизинде 2019 чылдан эгелеп «Өзүмнер» деп чогаал бөлгүмү ажыттынган. Бөлгүм шүлүкчү, чогаал шинчилекчизи, филология эртеминиң кандидады С. Комбунуң удуртулгазы-биле литературлуг угланыышкынныг ажылдап турар. Бөлгүм уругларның чогаал дугайында билиин ханылатпы­шаан, уран чо­гаалды сайгарып, бодалдарын шын илередип билиринге өөредип турар. Бөлгүмнүӊ ажылынче чечен чогаалга сундулуг, шүлүк бижиир салым-чаяанныг уругларны хаара тудуп, уругларның чогаадыкчы салым-чаяанын сайзырадырын чугулалап турар. Уругларның бижээн шүлүктерин, чогаалдарын «Сылдысчыгаш» солунга чырыдар. Ынчангаш чогаалга сонуургалдыг уругларны бөлгүмче келирин кыйгырып турар-дыр бис. Ук мөөрейниң база чогаал бөлгүмүнүң ажылын түңнеп, чыл төнчүзүнде уругларның чогаалдарының чыындызын үндүрер деп сорулгалыг бис. Саяна Ооржак, К.И. Чуковский аттыг уругларның ном саңының чурт-шинчилел болгаш национал чогаал килдизиниң эргелекчизи. (2019 чылдың ноябрь 19-та үнген № 47 "Сылдысчыгаш" солундан номчуп болур).